كلمات من احد الشرفاء على صفحة الثورة السورية على الفيسبوك كما جاءت حرفيا

شوفو انا تعبت كتير وبكيت كتير ,,, و رح احكي شي بدون ما خاف تكون الصفحة مراقبة او حدا يوصل الحكي لأي جهة ,,, العمر واحد والرب واحد و هي موتة وحدة خليها تكون بشرف ,,, ولكل الي قالو ما بدنا تروح رخيص بقلن انو كل شخص استشهد ابدا دمو ما رح يروح رخيص ,,, زمن الخوف انتهى ,,, و بكفي لحد هون وبس

من شوي حكيت مسنجر مع احد اصدقائي المقربين جدا وعم يخدم جيش بالشام و قلي انو عم يجهزوهن ليتحركو بكرا ع منطقة بدرعا او على دوما ,,, وطوال الاسبوع كانو عم يدربوهن كيف يقطعو الشوارع المؤدية للمدن والقرى و عطوهن تعليمات واضحة باستخدام السلاح في حال توجهت أي مظاهرة باتجاهن ,,, والكتيبة طالعة بالعتاد الكامل حتى صواريخ معن ,,, بدن يعيدو مجزرة حماة ,,, انا ما عاد صدق ولا واحد بالمية باللي عم يحكوه عن عصابات ومندسين وجهات خارحية وسبيس تون وساسوكي متآمرين علينا ,,, والي قرأ اليوم الوثائق المسربة من المخابرات بيعرف شو الخطة بالظبط ,,,

آخر كام جملة نقلاً عن لسان صديقي :
----
انا بعرف الحق مع مين و رح دافع عنو و اذا وصلك خبر اني انقتلت بكون برصاص من نفس الكتيبة ,,, بدي تكتب كل شي قلتلك ياه ,,, انا حاسس اني ما رح ارجع بدك شي ؟؟
----
شو كان بدي يا غالي وانا عم ابكي بحرئة عليك وعلى كل شب بالجيش وبسوريا ,,,شو بدي احكي وانا عم اتصور انو عم يقتلوك الكلاب لانك بتعرف انو الحق كل الحق عليهن ,,,

عم تقتلو شباب سوريا يا كلاب يا مجرمين ,,,
عم تقنعوهن يقتلو اهاليهن بايديهن ,,, عم تدربوهن ليطهرو البلد من الأحرار الي عم يطالبو بالحرية وعم يواجهوكن بإيدين عزلاء واصدر عارية
بدكن تعملو بانياس ودرعا ودوما حماة تانية

عم تعتقلو الولاد والنسوان وتعذبو الشباب ,,, والله لن يضيع دم الشباب هدر
ولن ينسى الشعب السوري كله المجازر الي عم تعملوها ,,, ولن ينسى الشعب السوري المهازل الي عم تفتعلوها بالإعلام لتغطو على جرايمكن
ولن يبرد دم الشهداء إلا بالحرية التي طالبو بها بحناجرهم قبل موتهم

انا شب سوري ,,, لا من الاخوان ولا من أي تنظيم تاني ,,, وما حدا دسني لاكتب هالحكي ,,, ولا حدا اشتراني ,,,لا بندر ولا خدام ولا لبنان ولا اسرائيل ,,, انا سوري بغار ع بلدي ,,, بخاف ع اهلي الي هن كل رجل سوري وكل امرأة سورية بيعرفو الحق

اي جهة أمنية ما بتعرف مين انا او حابة تعرف مين أنا بحب قلكن لا تدورو علي ,,, فيكن تنتظروني بالمطار قريبا ,, رح اجيكن برجلي ,,,

الخايف ع حالو يترك البيج والي خايف يحكي كلمة الحق يموت وهو خايف والرجال الخايف الي فيه بوجهه شوارب يحلئن لانو نسوان بانياس ودرعا و دوما طلعو أرجل من الرجال

لا تنسو حديث الرسول صلى الله عليه وسلم

أن من أعظم الجهاد كلمة عدل عند سلطان جائر ,,,

يارب احميه واحمي كل سورية وكل شباب ورجال ونساء سورية بحماك ,,,

الله ,,, سورية ,,, حرية وبس